ក្រចេះ : ថ្ងៃអង្គារ ទី១៨ ខែឧសភា ឆ្នាំ២០២១ រដ្ឋបាលខេត្តក្រចេះ បានប្រកាសពីករណីជាសះស្បេីយអ្នកជំងឺកូវីដ-១៩ ស្ត្រីអាយុ៧៣ឆ្នាំម្នាក់ នៅថ្ងៃទី១៨ ខែឧសភា ឆ្នាំ២០២១ មានឈ្មោះ អាង សន ភេទស្រី អាយុ៧៣ឆ្នាំ មានទីលំនៅនៅភូមិស្រែល្ពៅ សង្កាត់អូរ ឫស្សី ក្រុងក្រចេះ ខេត្តក្រចេះ ត្រូវបានក្រុមគ្រូពេទ្យព្យាបាលជាសះស្បើយ និងអនុញ្ញាតឱ្យចេញពីមន្ទីរពេទ្យត្រឡប់ទៅលំនៅឋានវិញដោយត្រូវបន្តធ្វើចតាឡីស័ករយៈពេល១៤ថ្ងៃនៅផ្ទះ។

រដ្ឋបាលខេត្តក្រចេះ បន្តទៀតថាប្រសិនបើប្រជាពលរដ្ឋក្នុងស្រុកនេះមានរោគសញ្ញា ផ្ដាសាយ ក្អក ហៀរសំបោរ ឈឺបំពងក ថប់ដង្ហើម ឬរោគសញ្ញាសង្ស័យផ្សេងៗ សូមទៅពិនិត្យសុខភាពនៅតាមមន្ទីរពេទ្យ ឬមណ្ឌលសុខភាព ដែលស្ថិតនៅជិតកន្លែង ដែលបងប្អូនស្នាក់នៅនិងរាយការណ៍ជូនអាជ្ញាធរមូលដ្ឋានជាបន្ទាន់។ និងសូមបង្កើនការប្រុងប្រយ័ត្នឲ្យបានខ្ពស់ ដោយត្រូវចូលរួម អនុវត្តនូវវិធានការការពារ "៣ការពារ និង៣កុំ" និងត្រូវអនុវត្តឲ្យបានម៉ឺងម៉ាត់នូវវិធានការអនាម័យតាមការណែនាំរបស់ក្រសួងសុខាភិបាល ដើម្បីការពារ និងទប់ស្កាត់ការីករាលដាលនៃជំងឺកូវីដ-១៩ ដែលកំពុងឆ្លងរីករាលដាលនៃជំងឺកូវីដ-១៩៕